الشاعر / أسامة عياد

قصيدة : ( قالولى تطلع مين ؟ )
قسم بقه يا زمن
غنيلهم الموال

عايزينى أرقص ليه
والبس لكوا الخلخال
قالولى تطلع مين ؟
قلتلهم الزبال
كانس كده حسرتى
ومعبى الف شوال
متهان ودى شغلتى
بتسب ليه يا خال
قالولى تطلع مين ؟
قلتلهم الشيال
هلكان كده بالقوى
وللهموم حمال
وضهرى دا منحنى
وتبسى ربع ريال
قالولى تطلع مين ؟
قلتلهم المرسال
ساعى على لقمتى
وللبريد جوال
طاير كده بلهفتى
وع الكعوب رحال
قالولى تطلع مين ؟
قلتلهم المحتال
بانصب ودى عشرتى
وللفلوس كيال
ما تخفش دى محبتى
ونبتى م السلسال
قالولى تطلع مين ؟
قلتلهم الطبال
بكيفى أنا عولمجى
يديق عليه الحال
صوبعى دى ثروتى
وهيه راس المال
قالولى تطلع مين ؟
سقفت للموال
راعوا بقى حرمتى !
أسألكوا بس سؤال؟
انتوا اللى تطلعوا مين ؟
جاوبونى انا فى الحال
ما تردوا ليه سكتوا
لسانكوا ليه تقال
عندى اقتراح ليكوا
هايل ومش بطال
خدونى انا بحرقتى
وسبولى بس عيال
حلمى و امنيتى
دا بعدى عنكوا محال
والله دى رحلتى
بعشق أنا الترحال
بعشق انا الترحال
بقلم الشاعر / أسامة عياد
........................................