Abdallah Baghdady

نايم فى وسط السرير ، ومكتّر الغطيان

وجانبى دفايه والعة ، وكمان بقول بردان

بالذمّه مش دا افترا ، دا أكيد نسيت نفسى

ونسيت غلابه كتير ماتوا من النسيان
بقه بعد ده أدّعى إنّى صحيح إنسان ؟

*****************
نزلت ألف فى شوارعك يابلد ظالمه
فيها الشتا بيرتعش ، والناس ماهش سالمه
فرش الغلابه رصيفك ، واتغطّوا بالضلمه
وان ماتوا ياحسره مايلاقوا تمن الاكفان
بقه بعد ده ادّعى إنّى صحيح إنسان ؟
******************
مسكين نياب الأسى مغروزه فى ضلوعه
رايح لمقلب زباله ، قاصده على جوعه
لقى حاجه فيها ياكلها . . غمّسها بدموعه
سالت دموعى على خدّى ، مشيت خزيان
بقه بعد ده ادّعى إنّى صحيح إنسان ؟
*****************
أنا قلت يمكن ألاقى قلوب فيها رحمه
قابلنى راجل سمين هيموت من التخمه
بيجيب لكلبه الجميل كام كيلو م اللحمه
بصّيت له قال لى : ( سوفاج ) دودو بقه هفتان
بقه بعد ده ادّعى إنّى صحيح إنسان ؟
******************
مشيت أبكّت فى روحى واقول ياواد ناسك
أوعى تكون فى الدمار ده فقدت إحساسك
هو الهوان اللى داس جارك أكيد داسك
والبرد واكل أخوك فى بيت مالهش حيطان
بقه بعد ده ادّعى إنّى صحيح إنسان ؟
__________________
شعر:#عبدالله_بغدادى